Қурби расмии рубли Русия нисбат ба арзи миллии Тоҷикистон – сомонӣ тайи ҳафтаи ахир 4,7% поин рафт. Дар нуқтаҳои мубодилаи асъор 1000 рубл бо 100 сомонӣ иваз мешавад.
Рӯзи 27 ноябр қурби рубл нисбат ба сомонӣ аз ҷониби Бонки миллии Тоҷикистон дар сатҳи 0,1013 сомонӣ (барои 1 рубл) муқаррар шудааст. Расо як ҳафта пеш (20 ноябр) 1 рубл 0,1063 сомонӣ нарх дошт. Дар ҳамин ҳол, дар бонкҳои тиҷоратӣ 1000 рублро расо бо 100 сомонӣ иваз мекунанд.
Аз оғози соли равон рубли Русия нисбат ба сомонӣ ба андозаи 19,2% (аз 0,1217 сомонӣ барои 1 рубл) беқурб шуд.
Коҳиши қурби рубл нисбати сомонӣ дар пасманзари беқурбшавии он дар муқобили доллари амрикоӣ сурат мегирад: аз оғози моҳи ноябр қурби рубл нисбати доллар зиёда аз 8% поин рафт (1 доллар – 105 рубл).
Поинравии қурби рубл нисбат ба сомонӣ ба даромади оилаҳои муҳоҷирони тоҷик, ки дар Русия машғули коранд, таъсири манфӣ мерасонад. Агар дар аввали сол дар нуқтаҳои интиқоли маблағ ба онҳо барои 1000 рубл 121,7 сомонӣ медоданд, пас имрӯз 1000 рублро бо 100-101 сомонӣ иваз мекунанд.
Дар қаламрави Русия тибқи маълумоти манбаъҳои гуногун, ҳудуди 1,5 млн нафар шаҳрвандони Тоҷикистон кору зиндагӣ мекунанд.
Мувофиқи маълумоти Бонки ҷаҳонӣ, соли 2023 ҳаҷми интиқоли маблағ ба ҷумҳурӣ ба 5,7 млрд доллар расид, ки 6,6% зиёдтар нисбат ба соли 2022 мебошад. Беш аз 90%-и пулҳои интиқолёфта ба кишварро рубл ташкил медиҳад.
Сабабҳои беқурбшавии рублро коршиносони бахши молияи Русия ба таҳримҳо нисбати ширкату бонкҳо, ғалабаи Доналд Трамп дар интихоботи президентии ИМА, аз ҷониби Бонки марказии Русия боло бурдани меъёри бозтамвил, коҳиши содироту афзоиши воридот, камшавии фурӯши асъор дар бозори дохилӣ ва афзоиши талаботи сармоягузорони хориҷӣ ба асъор рабт медиҳанд.
