Кумитаи ҳолатҳои фавқулода хабар додааст, ки дар пайи боронҳои пуршиддат, раъду барқ ва омадани сел дар рӯзи гузашта ду нафар ҷон бохта, роҳҳои чанд минтақаи кишвар баста шудааст.
Ба гуфтаи ин ниҳод, субҳи рӯзи 2-уми май як сокини 25-солаи деҳаи Офтобрӯяи ҷамоати Росровути ноҳияи Деваштич ҳангоми чаронидани чорво бар асари раъду барқ аз расиши барқ ҷон бохтааст. Наҷотдиҳандагон ҳамроҳ бо сокинони деҳа ҷасади марҳумро пайдо ва ба хешовандонаш супоридаанд.
Ҳамчунин, Кумита гуфтааст, ки дар пайи омадани сел дар ноҳияи Ёвон як писари 12-солаи сокини деҳаи Якатути ҷамоати Даҳанаи ин ноҳия, вақти чорвочаронӣ зери сел монда, ҷон бохтааст. Манбаъ аз ин писари ноболиғ Ҷалолиддини Акбаралӣ ном бурда, гуфтааст, ки то кунун ҷустуҷӯи ҷасади ӯ идома дорад.
Ба навиштаи КҲФ, рӯзи гузашта, як духатри 18-солаи сокини шаҳри Бӯстон “ҳангоми аксгирӣ дар истироҳатгоҳи шаҳри Хуҷанд аз беэҳтиётӣ пояш лағжидаву ба дарёи Сир сарозер шудааст”. Наҷотдиҳандагон ин духтарро аз дарё зинда берун овардаанд.
Инчунин, ба иттилоъи КҲФ, дар пайи селҳои рӯзи гузашта дар ноҳияи Ёвон 5 замини наздиҳавлигии деҳаи Гулавшон-3-и ҷамоати Чоргул ва 4 замини наздиҳавлигӣ деҳаи Гулистон-2-и ҷамоати Даҳна зарар дидаанд.
КҲФ дар идома хабар додааст, ки субҳи рӯзи 2-юми дар километрҳои 5 то 25-уми роҳи мошингарди Айнӣ-Панҷакент сел ва сангреза фаромада, роҳи мазкурро чанд соат бастааст.
Сел ҳамчунин, дар деҳаи Хушекати ноҳияи Айнӣ ба заминҳои наздиҳавлигӣ, ҷуйборҳои оби полезӣ, роҳои дохилӣ ва иншооти ёрирасон ворид гардида, ба ин маконҳо зарар расондааст.
Мақомот ҳамчунин гуфтаанд, ки дирӯз дар километрҳои 144 ва 146-уми шоҳроҳи Душанбе-Чаноқ бар асари бориши борони пуршиддат сел омада, роҳро бастааст. Ин роҳ аз ҷониби ширкати “IRS”, ки барои нигоҳубини он аз ронандаҳо пул мегирад, поккорӣ шудааст. Ҳоло дар роҳи мазкур ҳаракати мошинҳои сабукрав иҷоза дода шудааст, вале он барои мошинҳои боркаш ҳамчунон бастааст.
КҲФ гуфтааст, ки рӯзи гузашта дар деҳаи Зиғари ҷамоати Нулванди ноҳияи Дарвоз ҳам сел омада, шоҳроҳи Душанбе-Дарвоз-Хоруғро бастааст.
Ин ниҳод илова кардааст, ки ҳоло ин роҳ барои мошинҳои сабукрави тамғаи “Ҷип” боз аст, аммо барои ҳаракати мошинҳои сабукрави дигар ва нақлиёти боркаш он баста боқӣ мемонад. Маълум нест, ки роҳи мазкур барои ҳаракати дигар мошинҳо кай боз мегардад.
Дар пайи гарм шудани ҳаво, КҲФ ҳушдор медиҳад, ки хатари омадани сел то чанд рӯзи дигар боқӣ мемонад. Ин ниҳод аз аҳолӣ хост, ки ин рӯзҳо аз рафтан ба моҳидорӣ, шикор, чорвочаронӣ ва чидани гиёҳҳои доруӣ худдорӣ кунанд.
Ҳамчунин, Кумита аз ронандагон хостааст, ҳангоми ҳаракат дар роҳҳои кӯҳӣ эҳтиёткор кунанд ва суръатро боло набурда, фосилаи байни мошинҳоро риоя намоянд. боэҳтиёт бошанд.
Ёдовар мешавем, ки соли гузашта бар асари 639 офати табиӣ (557 ҳолат дар соли 2023) 17 нафар ҷони худро аз даст доданд.
