Кумитаи ҳолатҳои фавқулода ва мудофиаи граждании Тоҷикистон то ҳол соҳиби чархбол нашудааст ва аз чархболи дигар ниҳодҳо истифода мекардааст. Вале ин ниҳод аз “дрон”-ҳо фаровон истифода карда, шуъбаи махсус ташкил кардааст.
Раҷабалӣ Раҳмоналӣ, раиси Кумитаи ҳолатҳои фавқулода ва мудофиаи гражданӣ имрӯз, 4-уми август, зимни нишасти матбуотӣ, гуфт, то ҳол ниҳоди зери роҳбариаш чархболи алоҳида надорад.
Дар баробари ин, ӯ таъкид кард, ки дар фаъолияти ниҳоди роҳбарикунандааш доштани чархбол муҳим аст.
“Боварӣ дорем, ки то охири сол чархбол дастрас мекунем”, – гуфт ӯ.
Ба қавли ӯ, дар ҳолати зарурат Кумитаи ҳолатҳои фавқулода ва мудофиаи гражданӣ аз чархболҳои Вазорати мудофиаи Тоҷикистон ва Қушунҳои сарҳадии Тоҷикистон истифода мекунад.
Зикр кардан ба маврид аст, ки баҳси чархболи алоҳида надоштани ин Кумита солҳо ин ҷониб идома дорад. Роҳбарони пешини ин ниҳод, аз ҷумла Рустам Назарзода, раиси пешини Кумитаи ҳолатҳои фавқулода дар нишасти соле пеш низ гуфта буд, то ҳол Кумита чархбол надорад, вале умедвор аст, дар ояндаи наздик онро дастрас хоҳанд кард.
Ӯ ҳам зикр карда буд, ки “феълан аз чархболи дигар сохторҳо истифода мекунем”.
Ба гуфтаи Раҷабалӣ Раҳмоналӣ, Кумита дар фаъолияти худ аз “дрон”-ҳо истифода мекунад ва дар ин замина шуъбаи алоҳида ҳам таъсис додааст.
“Дронҳо дар ҳолатҳои фаромадани тарма, омадани сел дар шоҳроҳҳои кишвар, аз ҷумла шоҳроҳи Душанбе-Чаноқ истифода мешаванд”, – гуфт ӯ.
