Шаби 11 октябр қаҳрамони ҷаҳон оид ба ҷудо миёни ҷавонон Муҳиддин Асадуллоевро садҳо нафар дар фурудгоҳи Душанбе ботантана пешвоз гирифтанд.
Қаҳрамони ҷавонро, ки дар Перу ба дарёфти медали тилло шарафёб гардид, бо чапакзаниҳои бардавом ва нидоҳои “Тоҷикистон ба пеш!” намояндагони сохторҳои соҳаи варзиши кишвар, мураббиён, наздикону пайвандон ва мухлисони ҷудо истиқбол карданд.
Медали тиллои Асадуллоев дар Лима сеюмин дар таърихи Тоҷикистон аст. Бори аввал ба чунин комёбӣ Сомон Маҳмабеков дар мусобиқоти қаҳрамонии ҷаҳон дар Марокаш соли 2019 ва медали тиллои дуюмро Нуралӣ Эмомалӣ соли 2022 дар Эквадор ба даст оварда буданд.
Худи Асадулло изҳор дошт, ки ғалаба барои ӯ на танҳо комёбии шахсист, балки заҳмати ҳамаи он касонест, ки ба ӯ бовар доштанд.
“Ман дастгирии тамои кишварро эҳсос мекардам.Дар ҳар як рақобат на танҳо барои худ, балки тамоми Тоҷикистон мубориза мебурдам”, – гуфт ӯ.
Ёдрас мекунем, ки дар мусобиқоти қаҳрамонии ҷаҳон дар Перу, ки аз 5 то 7 октябр баргузор шуд, Асадуллоев дар вазни 73 кг ба дарёфти меди тилло ва унвони қаҳрамони ҷаҳон даст ёфт. То дарёфти медал, ӯ дар панҷ рақобат ғолиб омад.
Муовини раиси Федератсияи ҷудои Тоҷикистон Эргаш Маҳмадбеков зикр кард, ки ин комёбӣ натиҷаи кори мунтазам дар дастаи мунтахаб тайи солҳои ахир ва фаласафи нав дар ҷудо тоҷик аст, ки ба методика, таҷрибаи байнулмилалӣ ва эътимод ба ҷавонон асос ёфтааст.
“Мо ба раиси Федератсия Исмоил Маҳмадзир, ситоди мураббиён ва ҳамаи аъзои даста барои кори фидокорона изҳори миннатдорӣ мекунем, – зикр кард ӯ. – Дар зарфи се сол дар низоми миллии ҷудо сохтори муосири омодагӣ ташкил шуда, бо мактабҳои пешрафтаи Осиё ва Аврупо ҳамкорӣ ба роҳ монда шуд. Акнун мунтахаби Тоҷикистон рақиби комилҳуқуқи баргузидагони ҷудои ҷаҳон шинохта мешавад”.
