Дар ҷойи терминали куҳнаи Фурудгоҳи байналмилалии Душанбе терминали нав бунёд мешавад, ки ба гуфтаи мақомот, дар як сол имкони хидматрасонӣ ба қариб 3 млн мусофирро хоҳад дошт”. Дар ин бора Зайнулло Шарифзода, раиси ин фурудгоҳ рӯзи 28-уми январ дар нишасти матбуотӣ иттилоъ дод.
Ба гуфтаи ӯ, лоиҳакашӣ ба анҷом расида, сохтмони терминали нав, ки ҳоло барои парвозҳои маҳаллӣ истифода мешавад, рӯзҳои наздик оғоз меёбад. Терминал дар муҳлати то ду сол сохта мешавад.
“Ба наздикӣ сохтмони терминали навро оғоз мекунем. Он дар ҷойи терминали куҳнаи парвозҳои маҳаллӣ бунёд мешавад. Ҳоло корҳои лоиҳакаширо ба анҷом расонида истодааем. Терминали нав дар як сол ба қариб 3 млн мусофир хидматрасонӣ мекунад ва дар якҷоягӣ бо терминали байналмилалӣ солона ба 5 млн мусофир хидматрасонӣ имконпазир хоҳад шуд”,- гуфт Зайнулло Шарифзода.
Аз фурудгоҳи байналмилалии Душанбе ба “Азия-Плюс” гуфтанд, ки то бунёди терминали нав парвозҳои маҳаллӣ низ тавассути Терминали 1, ки дар шафати терминали кӯҳна ҷойгир аст, анҷом меёбанд.
Дар баробари ин Ҳабибулло Назарзода, раҳбари Оҷонсии ҳавонавардии Тоҷикистон дар нишасти матбуотии рӯзи 28-уми январ гуфт, ки имсол терминали фурудгоҳҳои байналмилалии шаҳрҳои Хуҷанд, Бохтар ва Кӯлоб низ таҷдиду навсозӣ мешаванд.
“Ҳоло мо бо бонкҳои сармоягузорӣ ҳамкорӣ карда истодаем, ки дар соли 2026 дар фурудгоҳҳои Кӯлобу Бохтар низ бо ҷалби сармоя терминалҳои наву замонавии мусофиркашонӣ ба роҳ монем”,-изҳор дошт Назарзода.
ИЗОБРАЖЕНИЕ Терминали наве, ки соли 2014 сохта шуд
Тибқи маълумоти Фурудгоҳи байналмилалии Душанбе, соли гузашта ҷиҳати таҷдиди ангари техникаҳои махсуси хидматрасониҳои рӯизаминии фурудгоҳ 45 воситаи нави нақлиёт, харидорӣ шуда, ҳоло дар самтҳои гуногун фаъолият мекунанд.
“Инчунин дар соли 2025 дар масоҳати 400 ҳазор метри мураббаъ роҳҳои зимомӣ ва перронии фурудгоҳ таъмиру мумфарш шуданд. Роҳи нави зимомӣ бо дарозии 900 метр ва паҳноии 60 метр ва перонии нав бо масоҳати 48,6 ҳазор метри мураббаъ барои ғунҷоиши 5 ҳавопаймо сохта шуданд”,-гуфтанд аз фурудгоҳ.
Маълум нест, ки барои сохтмону таъмири таваққуфгоҳи иловагӣ ва хатҳои зимомӣ ва перонии фурудгоҳ чӣ қадар маблағ сарф шудааст. Аз фурудгоҳ инро шарҳ надоданд.
Бояд гуфт, ки то соли 2014 Фурудгоҳи байналмилалии Душанбе танҳо як терминал дошт, ки он ҳам замони шӯравӣ сохта шуда буд. Парвозҳои дохиливу хориҷӣ танҳо тавассути ин терминал анҷом меёфт.
Терминали нави Фурудгоҳи байналмилалии Душанбе, ки бо маблағгузории Фаронса ва ширкати VINCI Construction Grands Projets сохта шуд, расман рӯзи 3-юми сентябри соли 2014 ба истифода дода шуд.
