Мироҷ (Меҳроҷ) Абдуллоев, раиси Ҳизби коммунисти Тоҷикистон (ҲКТ) имрӯз, 7-уми апрел баъди нисфирӯзӣ дар синни 78 даргузашт. Ҷанозаи марҳум пагоҳ, 8-уми апрел соати 10:00 дар манзилаш дар шаҳри Кӯлоб баргузор мешавад.
Дар ин бора яке аз наздикони ӯ ба “Азия-Плюс” хабар дод. Сабаби марги ӯ маълум нест.
Мироҷ Абдуллоев, ки дар даъвати қаблӣ, солҳои 2020-2025 вакили парлумони кишвар низ буд, 9 сол инҷониб Ҳизби коммунисти Тоҷикистонро роҳбарӣ мекард.
Ӯ дар интихоботи президентии соли 2020 ҳамчун номзад ба мақоми президентӣ аз ҲКТ пешниҳод шуд, вале дар рақобат шикаст хӯрд. Ӯ он замон 72-сола ва куҳансолтарин нафар дар миёни шаш номзад ба мақоми президенти Тоҷикистон буд.
Ӯ кӣ буд ва чӣ корнома дошт?
Мироҷ Абдуллоев 15-уми августи соли 1948 дар ноҳияи Муъминобод ба дунё омадааст. Ӯ хатмкардаи Институти давлати педагогии шаҳри Кӯлоб ва Академияи Вазорати корҳои дохилии ИҶШС дар шаҳри Маскав аст.
Фаъолияти ӯ ҳамчун омӯзгор дар мактаби миёна оғоз шуда, минбаъд дар вазифаҳои давлатӣ ба кор оғоз намудааст. Ӯ солҳои зиёд дар мақомҳои баланд дар ниҳодҳои ҳифзи ҳуқуқ дар Хатлон фаъолият дошт.
Соли 2001 нозири калони шуъбаи дуюми Раёсати кофтукови ҷиноии Оҷонсии назорати маводи нашъаовари ҷумҳурӣ таъин шуда, то соли 2004 дар ин маснад ифои вазифа кард. Вай солҳои 2005-2011 ҳуқуқшиноси ҳукумати раиси шаҳри Кӯлоб буд.
Солҳои 2016-2017 намояндаи ташкилоти ҷамъиятии хайриявии байналмилалии “Ҳомиёни Ватан” дар шаҳри Кӯлоб ва ҳамзамон Котиби аввали Кумитаи ҲКТ дар ин минтақа буд.
Мироҷ Абдуллоев моҳи апрели соли 2017 баъди аз курси канор рафтани Шодӣ Шабдоло, раиси пешини Ҳизби коммунистии Тоҷикистон роҳбари ин ҳизб интихоб шуд. Ҳарчанд ӯ чеҳраи ноошно дар доираҳои сиёсӣ буд, дар даъвати қаблӣ, солҳои 2020-2025 вакили парлумони кишвар шуд.
Мироҷ Абдуллоев дар интихоботи парлумонии ахир ба парлумон роҳ наёфт ва ин ҳизб баъди чанд сол, аз курсии парлумон маҳрум шуд, аммо боз ҳам эътирозе надошт.
Ӯ он замон дар суҳбат бо “Азия-Плюс” гуфта буд, ки танҳо хоҳиш дошт, ки барои ҳизбаш “дар парлумон ақаллан як курсӣ медоданд”.
