Ҳайати музокиракунандаи Эрон бо раҳбарии Муҳаммадбоқир Қолибоф, раиси Маҷлиси шӯрои исломии ин кишвар, барои музокира бо Амрико вориди Исломобод, пойтахти Покистон шудааст. Ҳайати музокиракунандаи Амрико бошад бо роҳбарии Ҷей Ди Венс, ноиби раисҷумҳури Амрико дар роҳ ба сӯи Исломод аст.
Расонаҳои эронӣ менависанд, ки ҳамроҳи Қолибоф, аз ҷумла нафарони зерин ба Покистон рафтаанд:
- Аббос Ароқчӣ, вазири корҳои хориҷии Эрон;
- Алиакбар Аҳмадиён, дабири Шӯрои дифоъ;
- Абдунносир Ҳимматӣ, раиси Бонки марказӣ;
- Козим Ғарибободӣ, муовини вазири корҳои хориҷӣ;
- Алӣ Боқирии Канӣ, муовини сиёсати хориҷии дабирхонаи Шӯрои олии амнияти миллӣ;
- Маҳмуд Набавиён, намояндаи Маҷлиси шӯрои исломӣ;
- Абулфазл Амуйӣ, дастёри корҳои байналмилалии Қолибоф;
- Маҳдӣ Муҳаммадӣ, мушовири роҳбурдии Қолибоф.
Аз сӯи дигар, ба гузориши расонаҳо, Ҷей Ди Венс, муовини раисҷумҳури Амрико ва раиси ҳайати музокиракунандаи ин кишвар низ дар роҳ ба Покистон аст ва ҳавопаймои ҳомили ӯ барои сӯхтгирӣ як исти кӯтоҳ дар шаҳри Пориси Фаронса анҷом додааст. Дар музокира бо Эрон Вэнсро чунин нафарон ҳамроҳӣ мекунанд:
- Стив Уиткофф, намояндаи вижаи Амрико дар умури Ховари Миёна;
- Ҷаред Кушнер, соҳибкори америкоӣ ва домоди Доналд Трамп, раисҷумҳури ин кишвар.
Ба навиштаи расонаҳои Эрон, музокиракунандаи ин кишвар дар як ҳайати муташаккил аз кумитаҳои амниятӣ, сиёсӣ, низомӣ, иқтисодӣ ва ҳуқуқӣ иборат аст ва “дар сурате, ки тарафи муқобил пешшартҳои Эрон барои оғози музокиротро қабул кунад, гуфтугӯҳо оғоз мешаванд”. Қолибоф пеш аз сафар ба Исломобод ин пешшартҳоро қатъи ҳамлаҳои Исроил ба Лубнон ва раҳоии дороиҳои масдудшудаи Эрон гуфта буд.
Ҳайати эрониро, ки бо парвози “Миноб 168” ба Исломобод сафар кардааст, Муҳаммад Исҳоқ Дор, вазири корҳои хориҷӣ ва Осим Мунир, фармондеҳи артиши Покистон, истиқбол гирифтанд. Ин парвоз ба ёди 168 дониошомӯзи мактаби шаҳристони Миноби Эрон, ки дар ҳамлаи мушакии Амрико кушта шуданд, “Мноб 168” номгузорӣ шудааст.
Шаҳбоз Шариф, нахуствазири Покистон чанд соат пеш эълон кард, ки музокироти Эрон ва Амрико имрӯз оғоз мешавад ва онро ро фурсати “сарнавиштсоз”-е барои дастёбӣ ба сулҳ хонд. Ӯ илова кард, ки ин нишаст на танҳо барои Покистон, балки барои ҷаҳони Ислом “лаҳзаи таърихӣ” ва “мояи ифтихор” аст.
Қолибоф дар остонаи шуруъи гуфтугӯҳо дастёбӣ ба созишро ба қабули ҳуқуқҳои Эрон аз сӯи Амрико вобаста донистааст. Ӯ илова кардааст, ки “Эрон бо ҳусни ният барои музокироти Исломобод омадааст, аммо эътимоде ба Амрико надорад”.
Пеш аз ин Венс бо изҳори хушбинӣ аз гуфтугӯҳо бо Эрон гуфт, ки “агар Эрон моил бошад бо ҳусни ният музокира кунад, мо дасти дӯстӣ дароз хоҳем кард”.
Оташбас ва акнун музокироти Эрон ва Амрико баъд аз ҷанги 40 рӯза, ки бо ҳамлаи Амрикову Исроил ба Ҷумҳурии Исломӣ оғоз шуд, бо миёнҷигарии нахуствазири Покистон Шаҳбоз Шариф фароҳам омад. Таҳлилгарон нақши Чинро низ дар эъломи оташбас муассир медонанд ва мегӯянд, ин талоши якҷояи Пекину Исломобод буд, ки аз забони Шаҳбоз Шариф баён шуд.
Ба ҳайати музокиракунандаи Эрону Амрико дар Исломобод киҳо дохил мешаванд? Дар ин матлаби мо хонед: Музокироти Эрону Амрико дар Исломобод: Чеҳраҳои аслӣ кистанд?
Дар Telegram, Facebook ва Instagram бо мо бимонед.
