Ин Шӯро дар назди раисҷумҳур таъсис ёфта, қарори дахлдор дар ин бора дар пойгоҳи ҳуқуқӣ ва иттилоотии Вазорати адлия нашр шудааст. Санад дар ин бора рӯзи 23-юми майи соли 2026 қабул шудааст.
Тибқи қарор, ин ниҳод мақоми доимоамалкунандаи машваратию маслиҳатӣ дар назди президенти Тоҷикистон мебошад. Онро раисҷумҳури Тоҷикистон роҳбарӣ карда, муовини раиси Шӯро муовини аввали сарвазири кишвар аст.
Ба ҳайати Шӯро, муовини роҳбари дастгоҳи иҷрояи президент, вазирони адлия, рушди иқтисод ва савдо, молия, раиси Кумитаи давлатии сармоягузорӣ ва идораи амволи давлатӣ, сардори Маркази технологияҳои иттилоотӣ ва коммуникатсионии дастгоҳи иҷроияи президент шомил мешаванд.
Директори Агентии инноватсияҳо ва технологияҳои рақамии кишвар котиби Шӯро аст.
Ғайр аз ин мақоми нав бояд ҳамкориии мутақобилаи мақомоти давлатӣ, ташкилоту корхона ва бахши хусусиро таъмин кунад.
Муайян кардани самтҳои афзалиятноки сиёсати давлатӣ дар соҳаи иқтисоди рақамӣ ва таҳияи пешниҳодҳо оид ба рушди он дар Тоҷикистон аз ҷумла вазифаҳои асосии Шӯро номбар шудааст.
Ҳамчунин Шӯро ба роҳандозии муколама байни давлат ва бахши хусусӣ оид ба масоили пешбурд ва рушди иқтисоли рақамӣ машғул хоҳад шуд.
Баргузори таҳқиқот ва таҳлил оид ба масоили иқтисоди рақамӣ, дастгирии лоиҳаҳои инноватсионӣ, рушди зерсохтори рақамӣ, баланд бардоштани саводнокии рақамӣ ва ҷорисозии технологияҳои муосир аз вазифаҳои муҳими Шӯро дониста мешаванд.
Қаблан дар Тоҷикистон Барномаи миёнамуҳлати рушди иқтисоди рақамӣ дар Ҷумҳурии Тоҷикистон барои солҳои 2026-2030 тасдиқ шуд. Ғайр аз ин солҳои 2025-2030 дар кишвар Солҳои рушди иқтисоди рақамӣ ва ва инноватсияҳо эълон шудааст.
