Душанбе. 21-уми май. ОИ «Азия-Плюс» – Субҳи имрӯз нахуствазири Тоҷикистон Оқил Оқилов ҷиҳати иштирок дар ҷаласаи нахуствазирони кишварҳои узви ИДМ, ки рӯзи 22-юми май ба кор шурӯъ мекунад, ба шаҳри Остона рафт.
Тибқи маълумоти расида ба ОИ «Азия-Плюс» аз хадамоти матбуоти сарвари давлат, нахуствазирро дар ин сафар вазири маорифи ҷумҳурӣ Абдуҷаббор Раҳмонов ва як қатор роҳбарони вазорату идораҳои кишвар ҳамроҳӣ мекунанд.
Мувофиқи маълумоти ВАО-и Қазоқистон, нахуствазирони кишварҳои узви Иттиҳоди Давлатҳои Мустақил дар Остона 18 лоиҳаи санадҳоро мавриди баррасӣ қарор медиҳанд. Масъалаи иҷрои Нақшаи чорабиниҳо оид ба амалисозии марҳилаи аввали Стратегияи рушди иқтисодии ИДМ то соли 2020 дар меҳвари рӯзномаи ҷаласа қарор хоҳад дошт.
