Душанбе. 22-уми январ. ОИ «Азия-Плюс» – Дар давоми як ҳафтаи ахир аз тарафи кормандони Оҷонсии назорати маводи мухаддири кишвар дар ҷумҳурӣ якчанд амалиёти фаврӣ-ҷустуҷӯӣ ҷиҳати боздошти ашхоси бо хариду фурӯши ғайриқонунии маводи мухаддир сарукордошта бомуваффақият анҷом дода шуд.
Тавре ба ОИ «Азия-Плюс» аз оҷонсии мазкур хабар доданд, тӯли ин муддат дар натиҷаи амалиёти кормандони агентӣ 6 далели муомилоти ғайриқонунии мухаддарот ошкор карда шуда, аз қочоқбарон 8 кило маводи мухаддир, аз ҷумла 7 килограм ҳероин ёфт ва мусодира карда шуд. Ба гумони даст доштан дар ин ҷиноёт 7 нафар шаҳрванди Ҷумҳурии Тоҷикистон боздошт гардид.
Ба гуфтаи манбаъ, як тан аз қочоқбарони дастгиршуда, сокини вилояти Суғд будааст, ки аз моҳи ноябри соли гузашта таҳти бозҷӯӣ қарор дошт.
