Душанбе. 29-уми апрел. ОИ «Азия-Плюс» – Бо пешниҳоди Ӯзбекистон имрӯз дар шаҳри Тошканд вохӯрии навбатии роҳбарони комиссияи муштараки байниҳукуматии Тоҷикистону Ӯзбекистон оид ба аломатгузории марзи байни кишварҳо – котиби Шӯрои амнияти Тоҷикистон Амирқул Азимов ва муовини аввали нахуствазири Ӯзбекистон Рустам Азимов баргузор мешавад.
Чӣ тавре ки аз департмаенти иттилооти Вазорати умури хориҷии ҶТ ба ОИ «Азия-Плюс» хабар доданд, мулоқот бо иштироки намояндагони вазорату идораҳои дахлдори кишварҳо доир гардида, дар он ба ҷуз масъалаи идомаи фаъолияти комиссияи кишварҳо оид ба аломатгузории марзҳо дар чаҳор қитъаи боқимонда, инчунин масоили тезонидани корҳо дар самти мувофиқасозӣ ва имзои созишномаҳо дар бораи ифтитоҳи хатсайри ҳавоӣ миёни кишварҳо, воридоти гази табиии кишвари ҳамсоя ба ҷумҳурии мо ва ифтитоҳи хатсайрҳои дуҷонибаи мусофирбари нақлиёти заминӣ низ мавриди баррасӣ қарор мегиранд.
