Душанбе. 20-уми январ. ОИ «Азия-Плюс» – Ҳукумати Ҷумҳурии Тоҷикистон бо мақсади қабули муташаккили шаҳрвандони Тоҷикистон ба макотиби олии кишварҳои хориҷӣ аз рӯи стипендияи президенти кишвар қарори таъсиси муассисаи давлатии «Маркази барномаҳои байнулмилалӣ-ро тасдиқ кард.
Тавре ба ОИ «Азия-Плюс» вазири маорифи кишвар Абдуҷаббор Раҳмонов хабар дод, дар асоси қарори мазкур лоиҳаҳои қарорҳои ҳукумат «Дар бораи муқаррароти стипендияи байнулмилалии президенти ҶТ «Дурахшандагон», «Дар бораи фаъолияти комиссияи ҷумҳуриявӣ оид ба тайёр кардани кадрҳо дар хориҷа» ва тартиби интихоби номзадҳо барои таҳсил дар хориҷи кишвар таҳия гардиданд. «Бо ин мақсад соли 2009 аз Фонди президент 5 млн. сомонӣ ҷудо гардида, донишҷӯён тибқи муқаррароти мазкур, вазифадоранд дар муддати даҳ соли пас аз хатми таҳсил дар вазорату идораҳои ҷумҳурӣ кор кунанд», – гуфт ӯ.
А.Раҳмонов зикр кард, ки бинобар дарёфт нашудани номзадҳои арзанда барои таҳсил дар макотиби олии кишварҳои Ҳиндустон, Кореяи Ҷанубӣ, Покистон, Ҷопон ва дигар давлатҳо 10 квотаи воридгашта истифода бурда нашудааст.
Ёдовар мешавем, соли таҳсили 2008-2009 аз рӯи квотаи Вазорати маорифи ҷумҳурӣ 842 нафар барои таҳсил ба макотиби олии кишварҳои хориҷӣ фиристода шуд.
