Аз ноҳияи Ванҷ дар автомашинаи тамғаи «КАМАЗ» ба Душанбе зиёда аз 15 кило ҳашиш интиқол дода шуд.
Тавре ба ОИ «Азия-Плюс» аз Вазорати корҳои дохилии ҷумҳурӣ хабар доданд, зимни баргузории амалиёти махсус кормандони милисаи пойтахт сокини ноҳияи Ванҷ С.Ҷ.-ро бо ин миқдори зиёди маводи мухаддир боздошт карда, ҳашишро мусодира намуданд. Баъдтар маълум шуд, ки ӯ ин миқдор маводи мухаддирро ба пойтахт бо автомашинаи «КАМАЗ» оварда, барои фурӯш ба як сокини шаҳри Душанбе, зани 46-сола додаст. Ин зан низ боздошт шудааст.
Аз рӯйи ин далел парвандаи ҷиноӣ боз гардида, корҳои тафтишотӣ идома доранд.
Дар зарфи 8 моҳи соли равон дар қаламрави ҷумҳурӣ аз муомилоти ғайриқонунӣ 3 тоннаву 152 кило маводи мухаддир мусодира гардидааст, ки нисбат ба ҳамин давраи соли гузашта ба андозаи 31,5% бештар аст. Бино ба маълумоти мақомоти марбут ба мубориза бо маводи мухаддир, солҳои ахир дар таркиби маводи мухаддири мусодирашуда ҳашиш бештар ба назар мерасад.
