Дар Хуҷанд Фестивали чоруми байналмилалии телевизионии кӯдаконаи «Донак» баргузор мегардад.
Аз 25 то 27 ноябри соли 2011 «Маркази манбаи фарҳанг ва ҳунар»-и шаҳри Хуҷанд бо дастгирии молиявии Институти «Ҷомеаи Кушода»- Бунёди Мадад дар Тоҷикистон ва мусоидати мақомоти иҷроияи ҳокимияти маҳаллии вилояти Суғд Фестивали чоруми байналмилалии телевизионии кӯдаконаи «Донак»-ро баргузор мекунад. Ҳадаф аз баргузории фестивали телевизионӣ тавсеаи лаёқати эҷодии кӯдакону наврасон аз манотиқи гуногуни Ҷумҳурии Тоҷикистон ва муаррифии эҷоди онҳо дар арасаи байналмилалӣ мебошад.
Дар даври аввали интихобӣ беш аз 200 нафар кӯдакони боистеъдоди аз 7-сола то 16-солаи шаҳру навоҳии вилояти Суғд иштирок карданд. Баъди даври дуюми интихобӣ, ки дар вилояти Суғд доир шуд, 30 нафар иштирокчиёни даври ниҳоӣ муайян гардиданд. Онҳо дар консерти ҷашнии фестивал 18 баромад пешниҳод мекунанд.
Дар фестивал беш аз 70 нафар кӯдакони боистеъдод аз Ӯзбекистону, Қирғизистон, Қазоқистон, Россия ва Тоҷикистон иштирок мекунанд.
Маълумот: Фестивали байналмилалии телевизионии кӯдаконаи «Донак» аз соли 2007 ин ҷониб бо дастгирии молиявии Институти «Ҷомеаи Кушода» – Бунёди Мадад дар Тоҷикистон доир мегардад.
