Бо қарори Комиссияи марказии интихобот ва раъйпурсии Ҷумҳурии Тоҷикистон барои баргузории интихоботи аъзои Маҷлиси миллии Маҷлиси Олии ҷумҳурӣ дар ҳавзаҳои интихоботии вилояти Суғд № 2, вилояти Хатлон № 3 ва шаҳру ноҳияҳои тобеи марказ № 5 комиссияҳои ҳавзавии интихоботӣ ташкил карда шуданд.
Ёдрас мекунем, ки маъракаи интихоботи аъзои палатаи болоии парлумони кишвар 25-уми феврали 2012 доир мегардад.
Қобили зикр аст, ки 15-уми декабри соли 2011 дар иҷлосияи навбатии Маҷлиси миллии Маҷлиси Олии Ҷумҳурии Тоҷикистон дархости шахсии собиқ аъзои палата собиқ раиси шаҳри Истаравшан Муним Холиқов, ноҳияи Рӯдакӣ Мансур Қодиров ва ноҳияи Панҷ Мирзодавлат Сабуров қонеъ гардонида шуда, ваколатҳои аъзои ММ МО ҶТ шахсони мазкур бекор карда шуд.
Ҳамин тариқ, аз 34 ҷой дар палатаи болоии парлумон 4 ҷой холӣ шуд. Нимаи соли гузашта бинобар даргузашти нобҳангоми раиси ноҳияи Тоҷикобод Махсум Фозилов ваколатҳои ӯ низ қатъ гардида буданд.
Вакилони маҷлисҳои маҳаллӣ 25 нафар аъзои Маҷлиси миллиро интихоб намуда, 8 нафари дигар бо фармони президенти ҷумҳурӣ таъин карда мешаванд.
Ғайр аз ин, собиқ президентҳои Тоҷикистон ба якумрӣ аъзои Маҷлиси миллӣ будан ҳуқуқ доранд. Дар даъватии феълии Маҷлиси миллӣ собиқ президенти ҶТ Қаҳҳор Маҳкамов аз чунин ҳуқуқ бархӯрдор аст.
