Дар шаҳри Хуҷанд бозии даври 6-уми мусобиқоти интихобии Чемпионати ҷаҳон-2014 миёни дастаи мунтахаби футболи Тоҷикистон ва Кореяи Шимолӣ мусовӣ бо ҳисоби 1 бар 1 анҷом ёфт.
Голҳо дар қисми дуюми бозӣ зада шуданд. Варзишгоҳи шаҳри Хуҷанд аз мухлисон пур буд.
Дар дақиқаи 54-уми бозӣ бозигари дастаи Тоҷикистон Фарҳод Восиев ба иштибоҳ роҳ дода, ба дарвозаи Тоҷикистон тӯби ҷаримавии 11-метра таъин гардид. Футболбози кореягӣ Сонг Хок онро ба самар расонид.
Дар дақиқаи 62-юм ба футболбози дастаи Тоҷикистон Аҳтам Ҳамроқулов муяссар шуд, ки ҳисобро баробар намояд. Дар дақиқаи 73-юм футболбози тоҷик Фатҳулло Фатҳуллоев аз лаҳзаи қулайи голзанӣ истифода бурда натавонист.
Пас аз анҷоми бозӣ миёни мухлисон аз рӯйи билетҳои воридшавӣ бозии лотерея гузаронида шуд. Ҷоизаи асосӣ дар бозии лотерея автомашинаи ВАЗ-2115 аст.
