Фазои сиёсии якқутбӣ, ки ахиран дар кишвари мо ҳукмрон шудааст, ба эҷоди буҳронҳо дар ҷомеа замина фароҳам меоварад. Дар ин бора зимни суханронӣ дар кори конфронс бахшида ба ёдбуди муассисони Ҳизби наҳзати исломии Тоҷикистон Саид Абдулло Нурӣ ва Муҳаммадшариф Ҳимматзода раиси ҲНИТ Муҳиддин Кабирӣ изҳори назар кард.
Тавре ба ОИ «Азия-Плюс» аз қароргоҳи марказии ҲНИТ хабар доданд, зимни суханронӣ дар ин чорабинӣ руҳонии маъруф ва сиёсатмадори варзида Ҳоҷӣ Акбар Тӯраҷонзода зикр кардааст, ки имрӯз дар узвияти ҲНИТ қарор доштан мояи ифтихор ва масъулият аст. Ӯ аз аъзои ҳизб даъват ба амал овардааст, ки сарфи назар аз фишори мавҷуда ба онҳо, таҳаммулпазириро пеша намоянд.
Дар конфронси ёдбуд ҳамчунин аъзои саршиноси ҳизб, рӯҳониёни маъруф, сиёсатшиносон, вакили палатаи поёнии парлумони кишвар Сӯҳроб Шарифов ва намояндагони корпуси дипломатии муқими шаҳри Душанбе суханронӣ карданд.
