Шоми 11-уми апрел бар асари селфароӣ дар қаламрави ноҳияи Хуросон ҳаракати нақлиёт тавассути роҳи мошингарди Қӯрғонтеппа-Душанбе қатъ гардид.
Тавре ба ОИ «Азия-Плюс» аз ситоди ҳолатҳои фавқулодаи вилояти Хатлон хабар доданд, дар маркази маъмурии ноҳияи Хуросон аз офати табиӣ заминҳои кишт, якчанд иншоот, аз ҷумла нуқтаи фурӯши маводи сӯзишворӣ ва нуқтаи хизматгузории техникии автомашинаҳо зарар дидаанд.
Айни замон дар макони офат комиссия машғули кор буда, ҳаҷми зарари расидаро муайян хоҳад кард. Хушбахтона, талафоти ҷонӣ ба қайд гирифта нашудааст.
Пас аз рух додани офат кормандони хадамоти истифодабарии роҳ ба тозакунии роҳ шуруъ намуда, қарибиҳои шом ҳаракати нақлиёт тавассути он барқарор карда шуд.
Бино ба маълумоти ситоди вилоят, рӯзи 10-уми апрел бар асари фаромадани сел 2 манзили зист дар ноҳияи Қумсангир осеб дидаанд. Ҳеҷ яке аз сокинони маҳаллӣ осебе надида, ҳаҷми хисорот муайян карда мешавад.
