Ахири ҳафтаи гузашта дар назди бинои Конгресси ИМА Ҷашнвораи анъанавии мероси Осиё (Asian Heritage Festival) доир гардид.
Диаспораҳои сершумори зодагони Осиё, ки дар Иёлоти Муттаҳидаи Амрико иқомат доранд, ба сокинону меҳмонони пойтахти Амрико намунаҳои фарҳанги ғании худ – сарулибос, рақсу суруди миллӣ, офаридаҳои ҳунармандону косибон ва ғизои миллиро пешкаш намуданд.
Дар ҷашнвораи мазкур диаспораи тоҷикони Амрико иштиоки фаъол дошт. Ассотсиатсияи чанде қабл таъсисёфтаи тоҷикистониёни Амрико (People of Tajikistan in America) дар ҳамдастӣ бо сафорати Тоҷикистон дар ИМА як гӯшаи махсуси Тоҷикистонро ташкил намуданд.
Тамошогарони зиёде имкон пайдо карданд, ки дар ин гӯша бо асбобҳои мусиқӣ, маснуъоти косибони ҳунармандон, сарулибоси миллӣ ва адабиёти тоҷикон аз наздик ошноӣ пайдо кунанд. Фаъолони Ассотсиатсия аз субҳ то шом тамошогаронро истиқбол намуда, ба онҳо дар бораи кишвари хурди кӯҳии мо маълумоти муфассал ва ба суолҳои сершуморашон посух доданд.
Рақси миллии хотирмони ҳамватани мо Парвина Мирҳоҷӣ дар партави қасри Капитолий ҳеҷ яке аз ҳозирон дар ҷашнвораро бетараф гузошта натавонист!
