Чанде қабл роҳбари намояндагии Хадамоти муҳоҷирати ҶТ дар Русия Асрор Одинаев бо сардори Раёсати хадамоти федералии муҳоҷирати вилояти Кемеровои Русия Евгений Осипчук мулоқот кард.
Тавре аз Маркази матбуоти Хадамоти муҳоҷирати назди ҳукумати ҶТ хабар доданд, дар ҷараёни мулоқот ба масоили фаъолияти хадамотҳо таваҷҷуҳ зоҳир шуда, ҳамчунин як қатор мушкилоти муҳими муҳоҷирати меҳнатии шаҳрвандони Тоҷикистон дар қаламрави ин вилоят мавриди баррасӣ қарор гирифтанд. Ҷонибҳо атрофи чораҳои минбаъда ҷиҳати барасмиятдарории қонунии ҳуҷҷатҳои муҳоҷирон, ки барои ба таври қонунӣ кору зиндагӣ кардани онҳо шароит муҳайё месозад, табодули афкор намуданд.
Е.Осипчук зикр кард, ки Раёсати хадамоти федералии муҳоҷирати вилояти Кемеровои Русия ояндаи наздик ният дорад, ки Маркази ягонаи муҳоҷиратро боз намояд. «Дар ин марказ муҳоҷирон натанҳо ҳуҷҷатҳои ба таври қонунӣ ба фаъолият машғул шудан, балки полиси тиббӣ ва дигар ҳуҷҷатҳои зарурӣ мутобиқи қонунгузории Русияро базудӣ дастрас карда метавонанд», – гуфт ӯ.
Дар навбати худ А.Одинаев ин иқдомро дастгирӣ намуда, изҳор кард, ки ҷониби Тоҷикистон дар ин самт ба ҳамкорӣ бо ҷалби имконоти КВД «Тоҷикхориҷакор омода аст.
Ба иттилои манбаъ, дар ҷараёни сафар А.Одинаев ҳамчунин бо 40 нафар донишҷӯёни тоҷики Донишкадаи давлатии кишоварзии Кемерово ва ҳудуди 40 нафар бинокорони тоҷик, ки дар сохтмони як беморхона саҳм мегузоранд, низ мулоқот кард.
