Фонди хайрияи кӯмак ба муҳоҷирони меҳнатии тоҷики шаҳри Санкт-Петрбурги Русия ба хона-интернати №1 барои кӯдакони имконияташон маҳдуди ин шаҳр бо як миқдор маҳсулоти ғизойӣ ва маводи канселярӣ кӯмак кард. Дар ин хона-интернат беш аз 300 нафар кӯдакони имконияташон маҳдуд тарбия мегиранд.
Тавре ба ОИ «Азия-Плюс» роҳбари Фонд Неъмат Бобоҷонов хабар дод, иқдоми мазкур ба муносибати Рӯзи байнулмилалии ҳифзи кӯдакон сурат гирифтаааст. «Қаблан мо аз ин хона-интернат боздид карда, аз эҳтиёҷоти мавҷудаи кӯдакон огоҳ гардидем ва маълум шуд, ки онҳо барои эҷодкорӣ ба маводи канселярӣ аз қабили қаламу ранг, албом ва ғайра ниёз доштаанд», – гуфт ӯ.
Номбурда ҳамчунин гуфт, Фонд минбаъд низ мувофиқи имкон ба хонаҳои кӯдакон ва интернатҳои шаҳри Санкт-Петербург кӯмак хоҳад расонид, зеро «хайру эҳсон кори ҳар як мусулмони оқил аст».
Фонди хайрияи кӯмак ба муҳоҷирони меҳнатии тоҷики шаҳри Санкт-Петрбурги Русия созмони ҷамъиятиест, ки чанде пеш дар шаҳри Санкт-Петербург таъсис ёфт. Ҳадаф аз таъсиси созмон кӯмак ба ҳамватанон дар ҳалли мушкилоти онҳо аст. Аз ҷумла, Фонд барои интиқоли ҷасадҳои муҳоҷирон ба ватан мусоидат менамояд. Ҳамчунин Фонд аксияҳои гуногуни хайрия низ доир месозад.
