Дар боздоштгоҳи муваққатии «Матросская тишина»-и шаҳри Маскав як марди 32-солаи гумонбар ба як силсила дуздиҳои хурд худро ба ҳалокат расонид.
Тавре хабаргузории Интерфакс иттилоъ медиҳад, ҷасади шаҳрванди Тоҷикистон рӯзи душанбеи ҳафтаи равон тахминан соатҳои 22:00 дар яке аз ҳуҷраҳои боздоштгоҳ дарёфт шудааст. Мард аз матои ҷойхоби худ дор сохта, ба он дар панҷараи тиреза худро ба дор овехтааст. Кормандони боздоштгоҳ кӯшиш кардаанд, ки ӯро наҷот диҳанд, вале он бенатиҷа анҷом ёфтааст.
Аз рӯйи далели даст ба худкушӣ задан санҷиши тотафтишотӣ гузаронида мешавад. Дар ҷараёни он сатҳи масъулияти гурӯҳи навбатдории боздоштгоҳ, ки ба худкушӣ омодагӣ гирифтани маҳбусро пай набурдааст, муайян карда хоҳад шуд.
Бино ба иттилои манбаъ, ин мард санаи 31-уми май дарҳол пас аз харидани миқдори зиёди героин боздошт гардидааст. Дар ҷараёни тафтишот даст доштани ӯ ба як силисла дуздиҳои хурд низ собит гардидааст. Ӯ бо роҳи дуздӣ барои харидории маводи нашъаовар маблағ ба даст меовардааст.
