Раиси Ҳизби наҳзати исломии Тоҷикистон, вакили палатаи поёнии парлумони ҷумҳурӣ Муҳиддин Кабирӣ бо даъвати Ҳизби озодӣ ва адолати Миср аз 1 то 4-уми июл аз шаҳри Қоҳира боздид кард.
Тавре ба ОИ «Азия-Плюс» аз қароргоҳи марказии ҲНИТ хабар доданд, Ҳизби озодӣ ва адолати Миср соли 2011 пас аз сарнагун сохтани ҳукумати Ҳуснӣ Муборак таъсис ёфта, пешвои он Муҳаммад Мурсӣ чанде қабл дар маъракаи интихоботи презденти Миср пирӯз шуд.
Ба иттилои манбаъ, зимни мулоқотҳо Муҳиддин Кабирӣ таъкид сохтааст, ки муҳимтарин вазифаи имрӯзаи ҳизбҳои ба пирӯзӣ расида дар кишварҳои мусалмонӣ, бунёди ҷомеъаҳои озод, пешрафта ва босубот мебошад ва дар сурати даст наёфтан ба ин ҳадафҳо, мардум байни неруҳои ислоҳотхоҳ ва низомҳои диктаторӣ фарқеро намебинад ва ин метавонад боиси бузургтарин зарба ба раванди барқарории адолат ва демократия дар ҷаҳони Ислом шавад.
Дар ҳошияи ин сафар, дар яке аз толорҳои шаҳри Қоҳира, ки дар он сафири Тоҷикистон дар Миср ҳам ширкат дошт, раҳбари ҲНИТ бо донишҷӯёни тоҷики муқими Миср мулоқот орост.
