Корманди ширкати аудитории «Сомон-аудит»-и вилояти Суғд ҳангоми гирифтани пора бо далели шайъӣ дастгир шуд.
Тавре ба ОИ «Азия-Плюс» аз Раёсати ВКД дар вилояти Суғд хабар доданд, корманди ширкати аудитории «Сомон-аудит» Ш.У. ҳангоми гирифтани ришва дар ҳаҷми 1 ҳазор доллари ИМА ва 2 ҳазор сомонӣ аз муҳосиби хоҷагиҳои деҳқонии ноҳияи Ашт Б.П. боздошт шудааст.
Ба иттилои манбаъ, Ш.У. аз муҳосиби хоҷагиҳои деҳқонии «Субҳи нав» ва «Ёрматов»-и ноҳияи Ашт, ки дар онҳо санҷиши молиявӣ гузаронидааст, барои ҳалли масъалаи тафтиш ба манфиати хоҷагиҳо ба миқдори дар боло зикршуда пора тамаъ кардааст.
Аз рӯйи ин далел дар прокуратураи шаҳри Хуҷанд мутобиқи моддаи 319-и КҶ ҶТ (Гирифтани пора аз ҷониби шахси мансабдор ё ба воситаи миёнарав) парвандаи ҷиноӣ боз шуда, тафтишот идома дорад.
Бино ба маълумоти Раёсати зиддифасоди вилояти Суғд, дар зарфи 6 моҳи соли равон дар қаламрави минтақаи шимоли ҷумҳурӣ 23 далели гирифтани пора аз ҷониби шахсони мансабдор ба қайд гирифта шудааст.
