Дар минтақаи ҷануби ҷумҳурӣ бори нахуст собиқ нозири минтақавии милисаи ноҳияи Ёвон Машраф Алиев ба истифодаи шиканҷа нисбати ноболиғ муттаҳам дониста шуда, ба 7 соли зиндони низомаш шадид маҳкум гардид.
Ғайр аз ин, ба ӯ ҷазои иловагӣ дар шакли манъи ишғоли вазифа дар мақомоти милиса ба муддати 5 сол низ муқаррар шудааст. Пас аз содир шудани ҳукм ҳимоятгарони судшаванда изҳор карданд, ки аз қарори суд норозӣ буда, ба суди вилоят ҷиҳати бекор кардани ин ҳукм шикояти кассатсионӣ мебаранд.
Дар мусоҳиба ба хабарнигори ОИ «Азия-Плюс» падари судшаванда изҳор кард, ки аз қарори суд қаноатманд нест. «Ин ҳамааш туҳмат аст. Шояд ҷойи писари ман ба касе даркор шуда бошад ва тасмим гирифтанд, ки ӯро барканор созанд», – гуфт ӯ.
Ҷониби ҷабрдида аз қарори суд қаноатманд будани худро изҳор дошт. «Писари ноболиғи маро бидуни ҳеҷ сабабе лату кӯб ва маъюб карданд. Ӯ худро куштанӣ буд, зеро дар ин андеша буд, ки боз дубора мавриди лату кӯб ва азобу шиканҷа қарор мегирад. Қарори суд одилона буда, мо қаноатмандем», – гуфт ӯ.
Ғайр аз ин, суд даъвои шаҳрвандӣ ба ин парвандаи ҷиноӣ оид ба ҷуброни молӣ барои табаобати ҷабрдида дар ҳаҷми 1 ҳазору 619 сомониро низ қонеъ намуд. Маблағи мазкур аз ҷониби Шуъбаи ВКД ҶТ дар ноҳияи Ёвон ва судшаванда М.Алиев ҷуброн хоҳад гардид.
Падари ҷабрдида мегӯяд, рӯзи 29-уми апрели соли 2012 пас аз ҷустуҷӯи зиёд писараш дар чердаки яке аз бомҳои деҳаи Қулободи ноҳияи Ёвон ба дор овехта дарёфт шуд. Наврас дар ҳолати вазнин ба бемористон оварда шуда, муддати ду ҳафта онҷо табобат гирифт.
Ёдрас мекунем, ки ҷабрдида пас аз бозпурсӣ ва мавриди шиканҷаву лату кӯб қарор гирифтан аз ҷониби нозири минтақавии милисаи ноҳияи Ёвон Машраб Алиев, аз ноумедиву тарсу ҳарос ба ин кор даст зада буд.
