Дар коллеҷи тиббии Кӯлоб оид ба интихоби омӯзгорон ба шуъбаи омодагии Донишгоҳои тиббии Тоҷикистон, ки расман ифтитоҳ мешавад, озмун доир гардид.
Тавре ба ОИ «Азия-Плюс» директори коллеҷ Ҷумъахон Назаров хабар дод, 10 нафар омӯзгорон интихоб гардида, аз 1-уми ноябр 40 нафар толибилмонро баҳри қабул шудан ба Донишгоҳи давлатии тиббии Тоҷикистон омода месозанд.
Ба қавли Назаров, аз рӯйи натоиҷи соли хониши 2011/2012, ки бар асоси санҷиш 8 нафар шунавандагон аз шуъбаи омодагӣ бевосита ба Донишгоҳи тиббӣ, чор нафар ба факултаи тиббии Донишгоҳи миллӣ ва боз ду нафари дигар ба макотиби олии тиббии Украина дохил шуданд, коллеҷ аз ин ҳуқуқ бархӯрдор шуд.
«Бо назардошти имконоти омӯзгорони мо ва заминаи моддии коллеҷи тиббӣ мақомоти раҳбарии Донишгоҳи тиббӣ тасмим гирифт, ки дар коллеҷ расман шуъбаи омодагиро боз намояд», – гуфт роҳбари коллеҷ.
Номбурда изҳор кард, ки мувофиқи озмун ба шуъбаи омодагӣ тамоми сокинони 10 ноҳияи минтақаи Кӯлоби вилояти Хатлон қабул карда мешаванд.
Қобили зикр аст, ки дар коллеҷи тиббии Кӯлоб аз рӯйи 7 ихтисоси тиббӣ 3 ҳазор нафар донишҷӯён тҳсил мекунанд.
