Кишоварзони ноҳияи Ашти вилояти Суғд аз иҷрои нақшаи ҷамъоварии пахта дар соли равон мужда расониданд.
Тавре ба ОИ «Азия-Плюс» аз Раёсати кишоварзии вилояти Суғд хабар доданд, соли равон деҳқонони ноҳия 8 ҳазору 703 тонна ҳосили пунбадона ҷамъоварӣ намуданд, ки 100,3%-и нақшаро ташкил медиҳад.
Ба иттилои манбаъ, аз оғози мавсим кишоварзони вилояти Суғд 94 ҳазору 718 тонна ҳосили пахта ҷамъоварӣ намуданд, ки ба 84,1%-и нақша баробар аст. Дар ҳамин давраи соли гузашта деҳқонони минтақаи шимоли ҷумҳурӣ 97 ҳазору 683 тонна пахта ҷамъоварӣ карда буданд, ки 93%-и нақшаро ташкил дода буд.
Соли ҷорӣ дар вилояти Суғд дар майдони 61 ҳазору 172 гектар пунбадона кишт шуда, ҷамъоварии 112,5 ҳазор тонна ҳосил ба нақша гирифта шудааст. Соли гузашта пунбадона дар майдони 65,4 ҳазор гектар кишт шуда, ба ҷойи 105 ҳазори тибқи нақша пешбинишуда 117 ҳазор тонна ҳосил ҷамъоварӣ гардида буд.
То имрӯз ноҳияҳои Сптамен, Конибодом ва Ашти вилояти Суғд аз иҷрои нақшаи пахта мужда расонида, иҷрои нақша дар ноҳияҳои Ҷаббор Расулов (86,9%) ва Мастчоҳ (78,4%) дар арафаи анҷомёбист.
