Ширкати миллии ҳавопаймоии «Тоҷик Эйр» парвози ҳавопаймоҳо ба шаҳри Дубайи Аморати Муттаҳидаи Арабро ба роҳ мемонад. Парвози ҳавопаймоҳо тавассути хатсайри ҳавоии Душанбе-Дубай-Душанбе санаи 29-уми октябр оғоз мегардад.
Бино ба маълумоти хадамоти матбуоти ширкати ҳавопаймоӣ, парвозҳо ба ин хатсайр дар як ҳафта ду маротиба, рӯзҳои душанбе ва ҷумъа дар ҳавопаймои муосиру бароҳати Боинг 737-500 анҷом дода мешаванд. Қимати билет аз 200 евроро ташкил медиҳад.
Қаблан бо истинод ба як манбаъ дар ширкати мазкур иттилоъ дода будем, ки ширкати давлатии ҳавопаймоии «Тоҷик Эйр» парвози ҳавопаймоҳо якбора ба се хатсайри нав – Деҳлӣ (Ҳиндустон), Исломобод (Покистон) ва Боку (Озарбойҷонро) мутаваққиф сохт. Ин хатсайрҳои нав соли равон ифтитоҳ шуда буданд. Сабаби мутаваққиф сохтани парвози ҳавопаймоҳо ба ин самтҳоро дар ширкат ба мавҷуд набудани мусофирони хоҳишманд шарҳ дода буданд.
Қобили зикр аст, ки айни замон ширкати «Тоҷик Эйр» парвозҳо ба Хуҷанду Хоруғ дар дохили кишвар ва шаҳрҳои кишварҳои хориҷӣ аз қабили Бишкек, Алмаато, 8 шаҳри Русия, Теҳрон, Машҳад (Эрон), Урумчӣ (Чин), Истамбул (Туркия) ва Шарҷа (АМА)-ро анҷом медиҳад.
