Дар суҳбат бо хабарнигори ОИ «Азия-Плюс» пешвои коммунистони тоҷик Шодӣ Шабдолов изҳор кард, ки дар маъракаи интихоботи президенти кишвар, ки моҳи ноябри соли 2013 дар назар аст, Ҳизби коммунисти Тоҷикистон ба ҳеҷ кадоме аз эътилоф бо аҳзоби сиёсии дигар ворид намегардад.
Ӯ таъкид кард, ки ҲКТ номзади ягона аз ин аҳзобро ба мансаби сарвари давлат низ дастгирӣ карданӣ нест.
Ба қавли вай, қарори мазкур ба асосҳои идеологӣ марбут аст. «Тибқи афкори идеологӣ коммунистон на бо ҲНИТ, на бо ҲУСДТ ва на бо дигар аҳзоби сиёсӣ ба эътилоф ворид шуда наметавонанд, – иброз дошт Шабдолов. – Мо ҳатто бо ҲХДТ номзади ягонаро пешбарӣ карда наметавонем, зеро мо хусусигардонии иншооти давлатиро эътироф надошта, ҲХДТ аз ин гуна сиёсат пуштибонӣ мекунад».
Пешвои коммунистон ҳамчунин зикр кард, ки дар анҷумани ҳизб қабл аз маъракаи интихобот ҲКТ номзади худ ба мансаби сарвари давлатро муайян хоҳад кард.
