Рӯзи 7 ноябри соли 2012 дар Театри давлатии ҷавонони ба номи М. Воҳидов маросими ҷашни Рӯзи театри тоҷик барпо гашт.
Тавре аз хадамоти матбуоти Вазорати фарҳанги ҷумҳурӣ иттилоъ доданд, дар оғоз Вазири фарҳанги Тоҷикистон Мирзошоҳрух Асрорӣ суханронӣ намуда, ҳозиринро ба муносибати Рӯзи театри тоҷик табрик гуфт.
Ба иттилои манбаъ, дар маросими тӯҳфасупорӣ Вазири фарҳанги кишвар Мирзошоҳрух Асрорӣ ба зиёда аз 100 нафар ҳунарманд ва корманди театрҳои ҷумҳурӣ нишони «Аълочии фарҳанги ҶТ», ифтихорнома ва мукофоти пулӣ супурд.
Зимнан зикр гардид, ки бахшида ба рӯзи театр бори аввал ба тамошобинон намоишномаи нави театри ҷавонони пойтахт ба номи М. Воҳидов «Поёни шаби сиёҳ сафед аст» дар таҳияи ҳунарманди халқии Тоҷикистон Мирзоватан Миров намоиш дода шуд. Дар доираи барномаи тантанавӣ ҳамзамон намоишгоҳи эҷодиёти Рассоми шоистаи Тоҷикистон Янтобте Маҳмадқулов низ баргузор шуд.
Қобили зикр аст, ки Рӯзи театри тоҷик дар ҷумҳурӣ ҳамасола 7-уми ноябр ҷашн гирифта мешавад. Ин сана соли 1997, пас аз қабули қонун «Дар бораи фарҳанг» таъсис дода шуд. Айни замон дар Тоҷикистон 17 театр фаъолият дорад, ки 6-тои онҳо дар пойтахт қарор доранд.
Театри касби тоҷик соли 1924 таъсис ёфтааст. Аввалин дастаи театрии миллӣ дар назди маъмурияти «Хонаи деҳқон» соли 1927 бо роҳбарии Ҳаким Карим таъсис ёфт, ки «Кружоки мусиқию драмавӣ» ном дошт.
