Дар мақомоти шаҳрдории Кӯлоб маросими рӯнамои лоиҳаи осоишгоҳи табобативу солимӣ ба маблағи 3 млн. сомонӣ баргузор шуд.
Тавре ба ОИ «Азия-Плюс» муовини раиси шаҳри Кӯлоб Озодӣ Ҳасанов хабар дод, осоишгоҳ дар қаламрави маҳаллаи аҳолинишини Чашмасори ҷамоати Зиракии ноҳияи Қӯлоб қомат афрохта, барои истироҳату табобати 150 нафар дар як вақт пешбинӣ шудааст.
«То ҳанӯз дар минтақаи Кӯлоб барои сокинон муассисаи истироҳату табобат мавҷуд набуда, аз ин рӯ, аҳолии минтақа аз хизматгузориҳои ба ин монанд муассисаҳо дар минтақаи шимоли ҷумҳурӣ истифода мекунад», – иброз дошт вай.
Ба қавли номбурда, корхонаи коркарди нахи пахтаи ҶДММ «Зарҳам» фармоишгари иншоот буда, лоиҳа аз ҷониби мутахассисони КВД «Лоиҳакаш»-и Агентии сохтмон ва меъмории назди ҳукумати ҷумҳурӣ таҳия гардидааст.
«Дар лоиҳаи шифохона бунёди биноҳои истиқомативу табобатӣ, 4 бинои оилавӣ, маҷмааи истироҳату фароғат, ҳавзи шиноварии болопӯш, толори варзиш ва ошхонаву тарабхона дар назар аст», – афзуд О.Ҳасанов.
