Санаи 2-юми ноябри соли равон дар Тоҷикистон Барномаи давлатии таъмини амнияти иштирокчиёни истеҳсолоти судии ҷиноӣ барои солҳои 2013-2016 тасдиқ карда шуд.
Тавре ба ОИ «Азия-Плюс» раиси Кумита оид ба қонунгузорӣ ва ҳуқуқи инсони палатаи поёнии парлумони ҷумҳурӣ Маҳмадалӣ Ватанов хабар дод, қонун «Дар бораи ҳимояти давлатии иштиркчиёни истеҳсолоти судии ҷиноятӣ» аввали соли гузашта қабул гардида, ҳадаф аз он амалисозии тадбирҳо дар таъмини ҳимояти давлатии ҷабрдидагон, шоҳидон ва дигар иштикчиёни истеҳсолоти судии ҷиноятӣ аст.
Ба қавли вай, маблағгузории барнома аз ҳисоби воситаҳои буҷети давлатӣ дар ҳаҷми беш аз 6 млн. сомонӣ (ҳудуди 1,3 млн. $) сурат мегирад.
«Маблағҳои барнома ба ҳимояти давлатии иштирокчиёни истеҳсолоти судии ҷиноятӣ, аз қабили муҳофизати шахсӣ, муҳофизати манзилу амвол, дастрасӣ ба воситаҳои махсуси муҳофизати инфиродӣ ва алоқа, таъмини махфӣ нигоҳ доштани маълумот дар бораи шахсони таҳти ҳифозат қарордошта, кӯчонидан ба маҳалли дигари зист ё муваққатан ҷойгир кунонидани онҳо дар макони бехавф, иваз кардани ҳуҷҷатҳо, тағийри намуди зоҳирӣ ва ғайра равона мегардад», – гуфт ӯ.
Зимнан зикр гардид, ки Вазорати умури дохилии кишвар ҳамоҳангсози барнома буда, дар баробари дигар вазорату идораҳои дахлдор оид ба амалисозии барнома масъул аст.
