Душанбе. 4-уми ноябр. ОИ «Азия-Плюс» – Дар ҳудуди бозори калонтарини пойтахт «Корвон» як корманди нуқтаи мубодилаи асъор ба зарби гулӯла кушта шудааст.
Тавре ба ОИ «Азия-Плюс» аз Вазорати умури дохилии Тоҷикистон хабар доданд, ҳодиса бомдоди дирӯз тақрибан соатҳои 6-у 30 дақиқа ба амал омад.
«Тибқи маълумоти пешакӣ, корманди нуқтаи мубодилаи асъор Аюб Сафаралиеви 21-сола замони расидан ба коргоҳаш аз автомати АКМ парронда шуд», – хабар дод манбаъ.
Ҷинояткорон 20 ҳазор сомонии қурбонии худро гирифта, бо мошин аз маҳали ҳодиса фирор карданд. Аз рӯи ин далел парвандаи ҷиноӣ боз шуда, тафтишот идома дорад.
