Душанбе. 12-уми феврал. ОИ «Азия-Плюс» – Сафари президенти Тоҷикистон ба кишварҳои Аврупо идома дорад. Шоми дирӯз ӯ аз шаҳри Брюссел бо сафари расмии дурӯза озими шаҳри Вилнюс – пойтахти Литва гардид.
Тавре аз хадамоти матбуоти сарвари давлат ба ОИ «Азия-Плюс» хабар доданд, имрӯз гуфтушуниди расмии Эмомалӣ Раҳмон ва президенти Литва Валдас Адамкус доир гардида, дар он масоили татбиқи стратегияи Иттиҳоди Аврупо дар минтақаи Осиёи Марказӣ, рушди минбаъдаи он, вазъи Афғонистону минтақа ва рушди ҳамкориҳои дуҷониба дар бахшҳои иқтисод, тиҷорат, амният, энергетика, нақлиёт, фарҳанг ва соҳаҳои дигар мавриди баррасӣ қарор хоҳанд гирифт.
Бино ба иттилои сомонаи расмии президенти Литва, аз рӯи натиҷаҳои гуфтушунидҳо тасвиби як қатор созишномаҳои ҳамкорӣ дар назар аст. Сипас сарони кишварҳо дар ҳамоиши тиҷоратии Литваву Тоҷикистон ширкат хоҳанд варзид. Ғайр аз ин, имрӯз президенти Тоҷикистон бо сарвазири Литва Андрюс Кубилюс низ мулоқот намуда, дар пояи муҷасамаи хотира ба ҳалокшудагон дар роҳи истиқлолияти Литва гулчанбар мегузорад ва бо фаъолияти яке аз посгоҳҳои марзии ин кишвар – Лавориш аз наздик ошно хоҳад гашт.
Фардо, рӯзи ҷумъа Эмомалӣ Раҳмон аз нерӯгоҳи гидроаккумулятсионии Круонис ва ҶСП «Элинта» дар Каунас боздид хоҳад кард. Нимаи дуввуми рӯзи 13-уми феврал ҳайати Тоҷикистон таҳти сарварии президенти кишвар Эмомалӣ Раҳмон сӯи Эстония роҳ пеш хоҳад гирифт.
