Қӯрғонтеппа. 25-уми май. ОИ «Азия-Плюс» –
C
уғдиён барои сокинони осебдидаи ноҳияи Хуросон даҳ манзили зист бунёд мекунанд.
Чӣ тавре ки ба ОИ «Азия-Плюс» мудири шӯъбаи экология ва ҳолатҳои фавқулоддаи Дастгоҳи иҷроияи президенти ҶТ Султон Раҳимов иттилоъ дод, мувофиқи фармоиши сарвари давлат, ҳамаи муассисаҳои давлатии кишвар ӯҳдадор гардиданд, ки то моҳи ноябр барои оилаҳои осебдидаи ноҳияи Хуросон манзили зист созанд. «Вилояти Суғд 10 ва Хатлон 70 манзили зист бунёд хоҳанд кард», – гуфт ӯ.
Ба гуфтаи ӯ, имрӯз намояндагони вилояти Суғд ба макони осебдида омада, ба наздикӣ корҳои сохтмониро оғоз мекунанд.
Дар ҳамин ҳол, сардори ситоди ҳолатҳои фавқулоддаи вилояти Хатлон Абдусаттор Хушвақтов мегӯяд, ҳамарӯза ба макони офат 200 тонна семент ва дигар масолеҳи сохтмон ворид мегардад. «Дар ҷойҳои бехавф барои оилаҳои осебдида қитъаи замин ҷудо гардид ва пас аз анҷоми корҳои омодагӣ ба сохтмони хонаҳо шурӯъ мекунем», – афзуд А.Хушвақтов.
