Душанбе. 27-уми июл. ОИ «Азия-Плюс» – Ҳаҷми истеҳсоли маҳсулоти кишоварзӣ дар Тоҷикистон афзуд.
Имрӯз зимни нишасти матбуотӣ муовини аввали вазири кишоварзии ҶТ Раҳмоналӣ Амиров изҳор дошт, ки дар шаш моҳи соли ҷорӣ дар бахши кишоварзии ҷумҳурӣ ба маблағи зиёда аз 1 млрд. 834 млн. сомонӣ маҳсулот истеҳсол карда шудааст, ки нисбат ба ҳамин давраи соли гузашта 14,7 дарсад зиёдтар аст.
Ба гуфтаи ӯ, ҳаҷми содироти маҳсулоти кишорзӣ ба хориҷи кишвар низ афзуда, дар ин давра 90 ҳазору 525 тонна маҳсулоти кишоварзӣ ба хориҷи ҷумҳурӣ бароварда шудааст. «Аз нисф зиёди маҳсулоти кишоварзии содиротшударо меваи хушк ташкил медиҳад, ки ҳаҷми умумии он 46 ҳазору 675 тонна аст», – афзуд Р.Амиров.
