Душанбе. 12-уми май. Азия-Плюс — Дар Прокуратураи генералии Тоҷикистон ҷаласаи навбатии Шӯрои ҳамоҳангсозии мақомоти ҳифзи ҳуқуқи ҷумҳурӣ баргузор шуд.
Тавре ба ОИ «Азия-Плюс» аз Прокуратураи генералии ҷумҳурӣ иттилоъ доданд, ҷаласа таҳти раёсати прокурори генералии кишвар Шерхон Салимзода доир гардида, дар он роҳбарони Вазорати корҳои дохилӣ, Кумитаи давлатии амнияти миллӣ, Агентии назорати давлатии молиявӣ ва мубориза бо коррупсия, Агентии назорати маводи нашъаовар, Хадамоти гумрук ва намояндагони Кумитаи андоз ва Суди Олии ҷумҳурӣ иштирок карданд.
Бино ба иттилои манбаъ, дар ҷаласа масъалаи иҷрои Қонуни Ҷумҳурии Тоҷикистон «Дар бораи фаъолияти фаврӣ-ҷустуҷӯйӣ» дар соли 2010 ва 4 моҳи соли равон мавриди баррасӣ қарор гирифта, зикр гардид, ки комёбии аслии мақомоти ҳифзи ҳуқуқ дар таъмини сулҳу осоиш дар ҷомеа, ҳифзи ҳуқуқи шаҳрвандон, таъмини тартиботи ҷамъиятӣ ва боздошти гурӯҳҳои ҷиноятпеша ифода меёбад.
Ҳамзамон қайд гардид, ки фаъолияти фаврӣ-ҷустуҷуйии мақомоти ҳифзи ҳуқуқ дар пешгирӣ ва ошкор сохтани ҷиноёти марбут ба терроризм, куштори барқасдона, муомилоти ғайриқонунии маводи мухаддир ва истифодаи ғайриқонунии замин чандон қаноатбахш нест.
