Дар ҳоле Эмомалӣ Раҳмон, раисҷумҳури Тоҷикистон, аз сокинони кишвар даъват ба амал овард, то барои ду соли наздик озуқа захира намоянд, ки аскари сокинони пойтахт иҷрои ин пешниҳодро ғайримумкин медонанд.
Ҳарчанд ағлаби шаҳрвандон хоҳиши барои хонаводаашон захираи маводи ғизоиро доранд, аммо камии маош ва баланд будани нархи маҳсулот дар бозор дар ин кор ба онҳо монеа мешавад.
Аз сӯи дигар онҳое, ки дар манзилҳои баландошёна ба сар мебаранд, барои нигаҳдории озуқа шароити муносиб надоранд.
Нарзулло Файзиев, як сокини пойтахт, мегӯяд, ӯ барои оилааш танҳо барои як моҳ орду биринҷ ва шакару равғанро метавонад захира кунад. Зеро аз як сӯ тавони харидории бештари ин маҳсулотро надошта бошад, аз ҷониби дигар барои нигаҳдории озуқа дар шароити хонаҳои танги баландошёна ҷой надорад.
Чун дар манзили сеҳуҷраӣ 7 нафар зиндагӣ мекунанд ва ҳатто таҳхона низ надоранд. Ин мусоҳиби мо афзуд, аксар вақт аз зиёд будани намӣ дар манзил орду биринҷ кирм мекунанд ва ғайри қобили истеъмол мешаванд.
Аммо Давлатбек Холиқов ба фарқ аз мусоҳиби қаблии мо соҳиби манзили заминист ва мегӯяд, роҳат метавонд дар манзили худ захираи чандсолаашро нигаҳ дорад. Ҳамчунин, ба хубӣ аз тарзи нагаҳдории ғизо барои дарозмуддат огоҳ аст. Масалан, ба гуфтаи вай барои он ки орду биринҷ кирм накунад, ба он намкаро омехта кардан лозим ва барои нагандидани пиёзу сабзӣ ва картошка бояд онҳоро дар чоҳ нигаҳ дошт. Вай меафзояд, замоне ҳатто то 5 тонна картошкаро дар манзилаш захира мекард, вале ҳоло нафақапулие, ки ӯ дарёфт мекунад, ҳатто ба харидории як халта орд намерасад.
Ба гуфтаи Давлатбек Холиқов, дар назди ҳавлияш як замини хурде дорад, ки пайваста дар он сабзавот мекорад,ва мавсимӣ ҳам бошад, аз сабзавоти худӣ истифода мекунанд.
