Душанбе. 26-уми май. «Азия-Плюс» — | Бо фармони президенти Тоҷикистон Эмомалӣ Раҳмон бинобар ба кори дигар гузаштан котиби Шӯрои амнияти ҷумҳурӣ Амирқул Азимов аз мансаб сабукдӯш гардид.
Тавре ба ОИ «Азия-Плюс» як манбаъи огоҳ аз ҳукумати ҷумҳурӣ иттилоъ дод, фармон дар таърихи 23-юми май ба имзо расида, ба вазифаи котиби Шӯрои амният то ҳанӯз касе таъин нашудааст.
Ёдрас мекунем, ки собиқ котиби Шӯрои амнияти ҷумҳурӣ Амирқул Азимов рӯзи 15 –уми май аз ҳавзаи якмандатии интихоботии № 4-и ноҳияи Синои пойтахт вакили Маҷлиси намояндагони Маҷлиси Олии Тоҷикистон интихоб гардид.
Рӯзи чаҳоршанбе, 25-уми майи соли ҷорӣ, дар ҷаласаи навбатии палатаи поёнии парлумони кишвар Амирқул Азимов ба ҳайси раиси Кумитаи Маҷлиси намояндагон оид ба тартиботи ҳуқуқӣ, мудофиа ва амният интихоб гардида, ба ҳайати Шӯрои парлумонӣ шомил шуд.
