Душанбе. 26-уми июл. «Азия-Плюс» — | Президенти Тоҷикистон Эмомалӣ Раҳмон бо мақсади шиносоӣ бо вазъи иҷтимоиву иқтисодӣ ва ҷараёни баргузории ислоҳот дар бахшҳои кишоварзӣ ва саноат ба ноҳияҳои Хуросон ва Абдураҳмони Ҷомии вилояти Хатлон сафар кард.
Тавре ба ОИ «Азия-Плюс» як манбаъ аз ҳукумати ҷумҳурӣ хабар дод, сарвари давлат зимни сафари якрӯзаи худ ба ин ноҳияҳо дар маросими мавриди истифода қарор гирифтани як қатор иншооти ба муносибати таҷлили 20-умин солгарди истиқлоли давлатӣ бунёдёфта ширкат хоҳад варзид.
«Ҳамчунин иштирок ва суханронии Эмомалӣ Раҳмон дар ҷаласаи фаъолони ноҳияҳои мазкур дар назар аст», – гуфт манбаъ.
Ба қавли манбаъ, дар ҷараёни вохӯриҳои президенти кишвар бо намояндагони бахшҳои гуногуни кишоварзиву иқтисод ба масъалаи таъмини амнияти ғизоӣ ва баргузории кишти такрорӣ таваҷҷӯҳи хосса зоҳир хоҳад гардид.
