Дар Вилояти Мухтори Кӯҳистони Бадахшон ҳангоми иҷрои корҳои таъмир дар нерӯгоҳи обӣ-барқии «Помир-1» ду нафар кормандони нерӯгоҳ ба ҳалокат расиданд.
Онҳо ҳангоми баргузории корҳои таъмиру пешгирӣ дар обанбори нерӯгоҳи мазкур ғарқ шудаанд. Ин ҳодисаи фоҷебаор дар таърихи 6-уми сентябри соли ҷорӣ рух додааст.
Аз Кумитаи ҳолатҳои фавқулодда ва мудофиаи граждании ҷумҳурӣ ба ОИ «Азия-Плюс» хабар доданд, ки дар обанбори нерӯгоҳ Одинабек Мирзоҷонови 50-сола ва Ошим Давронови 37-сола ба ҳалокат расидаанд.
«Наҷотдиҳандагони ба маҳалли ҳодиса ҳозиршуда ҷасадҳои онҳоро аз обанбор берун оварда, ба хешовандонашон супурданд», – гуфтанд дар кумитаи мазкур.
Айни замон сохторҳои марбута ба муайян кардани сабаби марги кормандони НОБ-и «Помир-1» машғуланд.
