Вазири корҳои хориҷии Тоҷикистон Ҳамрохон Зарифӣ дар чаҳорчӯби муколамаҳои сиёсӣ дар иҷлосияи 66-уми Маҷмаъи кули Созмони Милали Муттаҳид суханронӣ намуда, изҳор кард, ки амалисозии стратегияи миллии рушд самти муҳими сиёсати иқтисодии ҳукумати Тоҷикистон боқӣ мемонад.
Бино ба маълумоти радиои СММ, ҳукумати Тоҷикистон се ҳадафи асосӣ – таъмини амнияти ғизоиву энергетикӣ ва раҳоӣ аз бунбасти коммуникатсиониро муайн кардааст.
Зимни суханронӣ Ҳамрохон Зарифӣ хотиррасон кард, ки ҳукумати Тоҷикистон бобати узвият ба Созмони ҷаҳонии савдо фаъолона гуфтушунид дорад. Дар робита ба масоили идораи пурсамари захоири обӣ дар минтақаи Осиёи Марказӣ вазири корҳои хориҷии Тоҷикистон зикр кард, ки соли 2013 Соли байнулмилалии ҳамкорӣ оид ба масоили истифодаи захоири обӣ эълон шудааст.
«Бо назардошти манфиатҳои умумии минтақавӣ Тоҷикистон ба ҳамкории густарда оид ба тамоми масоили истифодаи оқилонаи захираҳои обиву энергетикӣ бо тамоми кишварҳои минтақа омода аст», – гуфтааст Зарифӣ.
Вазири корҳои хориҷии Тоҷикистон таъкид кардааст, ки ба хушкшавии баҳри Арал обанборҳои сохташуда дар кишварҳои поёноб таъсири назаррас мерасонанд.
«Аз ин рӯ, Тоҷикистон пешниҳод мекунад, ки бо мусоидати СММ ташхиси маҷмӯавии тамоми низоми истифодаи захираҳои обӣ дар минтақаи Осиёи Марказӣ гузаронида шавад», – иброз доштааст Ҳ. Зарифӣ.
