Танҳо дар семоҳаи дуюми соли 2011 тавассути низомҳои интиқоли пул аз Русия ба Тоҷикистон 742 млн. доллари ИМА фиристода шудааст.
Бино ба маълумоти Бонки марказии Русия, дар ин давра маблағи ҳар як интиқол ба Тоҷикистон ба ҳисоби миёна 366 доллари ИМА-ро ташкил додаст.
Тоҷикистон аз ҷиҳати ҳаҷми интиқоли маблағ аз Русия миёни кишварҳои узви Иттиҳоди Давлатҳои Мустақил (ИДМ) дар семоҳаи дуюми соли ҷорӣ пас аз Ӯзбекистон мақоми дуюмро ишғол менамояд. Дар ин давра аз Русия ба Ӯзбекистон дар ҳаҷми 1,067 млрд. доллари ИМА маблағ интиқол дода шудааст.
Мақоми сеюмро аз ҷиҳати интиқоли маблағ аз Русия миёни кишварҳои узви ИДМ дар семоҳаи дуюми соли равон Украина касб кардааст, ки ҳаҷми маблағи интиқолёфта аз Русия 603 млн. доллари ИМА-ро ташкил медиҳад. Ҳаҷми маблағи аз Русия интиқолдода ба кишварҳои дигари узви ИДМ дар семоҳаи дуюми соли 2011 ба тариқи зайл аст: Қирғизистон – 400 млн., Арманистон – 298 млн., Молдова – 271 млн., Озарбойҷон – 257 млн., Қазоқистон – 91 млн., Белорус – 37 млн. ва Туркманистон – 9 млн. доллари ИМА.
Дар маҷмӯъ дар семоҳаи дуюми соли равон аз Русия дар ҳаҷми 4,359 млрд. доллари ИМА маблағ интиқол дода шудааст, ки 3,774 млрд. доллари ИМА-и он ба кишварҳои узви ИДМ рост меояд.
Ёдрас мекунем, ки дар семоҳаи аввали соли ҷорӣ аз Русия ба Тоҷикистон дар ҳаҷми 438 млн. доллари ИМА маблағ фиристода шуда буд. Ҳамин тариқ, дар зарфи ним соли аввал аз Русия ба Тоҷикистон дар ҳаҷми 1 млрд. 180 млн. доллари ИМА маблағ интиқол дода шудааст. Дар хусуси ҳаҷми маблағҳои интиқолёфта дар семоҳаи сеюм Бонки марказии Русия ҳанӯз маълумот пешниҳод накардааст.
