Вазири корҳои хориҷии Ҷумҳурии Тоҷикистон Ҳамрохон Зарифӣ Сафири Фавқулода ва Мухтори Ҷумҳурии Ҳиндустон дар Ҷумҳурии Тоҷикистон Аситҳ Кумар Бҳаттачарҷиро бо хоҳиши ҷониби ҳиндустонӣ ба ҳузур пазируфт.
Тавре аз департаменти иттилооти Вазорати корҳои хориҷии ҷумҳурӣ иттилоъ доданд, дар ҷараёни мулоқот ҷонибҳо масъалаҳои рушди ҳамкориҳои дуҷонибаи Тоҷикистону Ҳиндустонро дар соҳаҳои маориф, илму техника, савдо, сармоягузорӣ ва барқарор намудани хатсайрҳои ҳавоӣ байни ду кишвари дӯст мавриди баррасӣ қарор доданд.
Бино ба маълумоти Вазорати корҳои хориҷии ҷумҳурӣ, шурӯъ аз соли 2001 ширкати ҳавопаймоии миллии Тоҷикистон мунтазам аз шаҳри Душанбе ба шаҳри Деҳлӣ парвозҳо анҷом медод. Аммо бинобар худкифо набудан, соли 2006 парвозҳо бо ин хатсайр боздошта шуданд.
Муносибатҳои дипломатӣ миёни Тоҷикистону Ҳиндустон соли 1992 роҳандозиву барқарор шуданд. Сафорати Ҳиндустон дар Тоҷикистон аз соли 1994 амал карда, сафорати Тоҷикистон дар Ҳиндустон соли 2003 ифтитоҳ гардид.
