Аз 140 мактаби таҳсилоти умумии амалкунанда дар пойтахти Тоҷикистон дар 40-тоаш тарки мансаб намудани директорони феълӣ дар назар аст.
Тавре ба ОИ «Азия-Плюс» аз Раёсати маорифи шаҳри Душанбе хабар доданд, комиссияи махсуси таъсисёфта оид ба иҷрои супориши раиси шаҳри Душанбе дар бораи иваз кардани директорони мактабҳои пойтахт, ки беш аз 5 сол дар ин мансаб ифои вазифа намудаанд, иваз кардани 40 нафар директорони мактабро тавсия додааст.
Бино ба иттилои манбаъ, комиссия зимни омодакунии пешниҳодот дар бораи иваз кардани директорони мактабҳо, пеш аз ҳама дастовардҳои муассисаи таълимӣ дар олимпиадаҳои сатҳҳои гуногунро ба инобат гирифтааст.
«Ғайр аз ин, қонуншиканиҳои аз ҷониби толибилмони мактабҳо содиршуда, сатҳи касбияту тахассуси омӯзгорони муассисаи таълимӣ ва муҳлати дар мансаби директори мактаб қарор доштани шахс низ ба эътибор гирифта шуд», – афзуд манбаъ.
Ёдрас мекунем, ки чанде қабл дар ҷаласаи мақомоти шаҳрдории пойтахт раиси шаҳри Душанбе Маҳмадсаид Убайдуллоев баҳри тақвият бахшидан ба масъулияти роҳбарӣ ва мусоидат ба баланд бардоштани сатҳу сифат дар низоми хоҷагидорӣ дастур фармуд, ки дар мӯҳлати ду ҳафта мудирони шӯъбаҳои маорифи ноҳияҳои шаҳр, директорони мактабҳои таҳсилоти умумӣ, инчунин сардухтурони дармонгоҳҳо ва беморхонаҳои зертобеи Раёсати тандурустии шаҳри Душанбе, ки беш аз панҷ сол ифои вазифа намудаанд, бо кадрҳои ҷавону соҳибтаҷриба иваз карда шаванд.
