Мақомоти шаҳрдории Кӯлоб ҷиҳати аз Қумсангир овардани 20 тонна битум ба он ҷо якчанд автомашинаҳои махсусро фиристодааст.
Тавре ба ОИ «Азия-Плюс» сардори Раёсати молияи шаҳри Кӯлоб Бахтиёр Наврӯзов хабар дод, битумро Вазорати нақлиёти кишвар ройгон барои таъмири роҳҳои автомобилгард миёни маҳаллаҳои аҳолинишини ноҳияи Кӯлоб ҷудо кардааст.
«Тайи 15 соли ахир дар аксари мавзеъҳо роҳҳо ниҳоят хароб гардида, ҳаракати нақлиёт миёни баъзе деҳаҳо ғайриимкон шудааст», – гуфт корманди раёсати молия ва афзуд, ки аз 20 тонна битум 360 тонна асфалт ҳосил гардида, корҳои асфалтхобониро Раёсати маҳаллии истифодабарии роҳ анҷом медиҳад ва хароҷоти ин корро низ Вазорати нақлиёт пардохт мекунад.
Дар ҳамин ҳол, Бахтиёр Назаров мегӯяд, аз ҷониби мудирияти соҳавии Дастгоҳи иҷроияи президент нақшаи барқарорсозӣ, сохтмони роҳҳои нави автомобилгард миёни кӯчаҳои шаҳри Кӯлоб дар маҷмуъ ба маблағи 37,5 млн. сомонӣ тасдиқ шудааст ва ин корҳо пас аз баргузории тендер ва дастгирии бурсии созмонҳои байнулмилалӣ анҷом дода мешаванд.
