Соли равон маҷрои рӯди Вахш барои сохтмони сарбанди нерӯгоҳи «Роғун баста намешавад. Бино ба маълумоти Вазорати энергетика ва саноати ҷумҳурӣ, ин қарор аз ҷониби саҳҳомони ҶСК «НОБ Роғун» қабул шудааст.
Дар Вазорати энергетика ва саноат мегӯянд, ба таъхир афтодани корҳои бастани маҷрои рӯди Вахш ба аз ҷониби коршиносони байнулмилалӣ пешниҳод нашудани ташхисҳо оид ба нерӯгоҳ марбут аст.
Ёдрас мекунем, ки Бонки ҷаҳонӣ барои ду таҳқиқоти арзёбӣ ҷиҳати баҳодиҳии ба мақсад мувофиқ будани лоиҳаи Нерӯгоҳи барқӣ-обии Роғун (НБО) тибқи стандартҳои байналмиллалӣ, бахусус арзёбии фаннӣ ва иқтисодӣ ва арзёбии таъсири экологӣ ва иҷтимоӣ маблағ ҷудо намуд. Тибқи қарордод бо Ҳукумати ҶТ, ду гурӯҳи байналмиллалии коршиносон дар таҳқиқоти арзёбӣ иштирок карда, фикру мулоҳизаҳо ва тавсияҳои худро пешниҳод менамояд. Ғайр аз ин, дар давоми раванди мазкур, кишварҳои ҳавзаи дарёӣ бо маълумот таъмин карда шуда, ба ҷараёни машварат ҷалб карда мешаванд.
Нахуст дар машваратҳои Алмаато пешбинӣ шуда буд, ки Бонки ҷаҳонӣ то ахири соли 2011 натиҷаҳои ташхисро дастрас хоҳад кард, вале моҳи декабри соли гузашта директор оид ба стратегия ва лоиҳаҳои БҶ дар минтақаи Аврупо ва Осиёи Марказӣ Теодор Алерс зимни боздид аз Тоҷикистон оид ба масоили раванд ва методологияи гузаронидани таҳқиқот изҳори ташвиш намуд.
Моҳи майи соли равон хадамоти тоҷикиии Би-Би-Сӣ бо истинод ба яке аз кормандони масъули Бонки ҷаҳонӣ дар Душанбе хабар дод, ки Бонк бо Тоҷикистон дар мавриди масоили техникӣ гуфтушунид дорад.
Собиқ корманди масъули ҶСК «НОБ Роғун» дар робита ба ин масъала иброз дошта буд, ки «масоили техникӣ»-и зикршуда ба паст кардани сарбанд аз 335 метр то ба 170 метр дахл дорад.
Ахири моҳи майи соли ҷорӣ вазири корҳои ҳориҷии ҷумҳурӣ Ҳамрохон Зарифӣ гуфт, Тоҷикистон моҳи феврали соли 2013 анҷоми ташхисро интизор аст. «Мо дар ин хусус гуфтушунидҳои зиёд доштем ва акнун умедворем, ки гузориши ниҳоӣ моҳи феврали соли оянда омода мегардад», – гуфта буд Ҳ.Зарифӣ зимни сафар ба ИМА.
Ёдрас мекунем, ки Ӯзбекистон ба иллати ташвиши рахна шудани сарбанд бар асари заминҷунбӣ мухолифи сохтмони нерӯгоҳи «Роғун» аст. Аммо дар Тоҷикистон ин ташвишҳои кишвари ҳамсояро бепоя мехонанд, зеро дар кишвар чунин навъи сарбандҳо муддати чор даҳсола устувории худро собит кардаанд.
