Дар шаҳри Душанбе зимни гуфтушуниди муовини вазири мудофиаи Тоҷикистон Рамил Нодиров бо ҳайати Коллеҷи давлатии низомии Ҳиндустон таҳти сарварии контр-адмирал Равиндра Гайквад масъалаи тайёр кардани кадрҳои низомӣ барои Вазорати мудофиаи ҷумҳурӣ дар муассисаҳои таълимии низомии Ҳиндустон мавриди баррасӣ қарор гирифтанд.
Тавре ба ОИ «Азия-Плюс» як манбаъ аз Вазорати мудофиаи ҷумҳурӣ хабар дод, дар мулоқот ҳамчунин атрофи табодули таҷриба дар бахши омодасозии кадрҳои низомӣ, иштироки Ҳиндустон дар таҷдиди Донишгоҳи низомии Вазорати мудофиаи Тоҷикистон ва дигар масоили мавриди таваҷҷуҳи тарафайн табодули назар сурат гирифт.
Ҳайати низомии Ҳиндустон ҳамчунин бо муовини вазири корҳои хориҷии Тоҷикистон Низомиддин Зоҳидов низ дидору гуфтушунид кард. Дар мулоқот масоили роҳу воситаҳои рушди минбаъдаи ҳамкориҳои бисёрҷониба миёни Тоҷикистону Ҳиндустон баррасӣ шуданд.
