Дар зарфи 9 моҳи соли равон дар Тоҷикистон ба миқдори ҳудуди 10 млн. метри мукааб гази табиӣ истихроҷ шуд, ки беш аз 65%-и он ба КВД «Нафтугаз ва ангишт» рост меояд.
Тавре аз Вазорати энергетика ва саноати ҷумҳурӣ иттилоъ доданд, тайи моҳҳои январ-сентябри соли равон ба аҳолӣ ва корхонаҳои саноатии кишвар наздики 6,7 млн. метри мукааб гази табиии ватанӣ интиқол дода шудааст.
Аз ҷумла, дар ин давра ҳаҷми интиқоли гази ҶСК «Тоҷиктрансгаз» 960 ҳазор, корхонаи «Қӯрғонтеппагаз» – 448 ҳазор, ҶСК «Кӯлобгаз» – 2,4 млн. ва корхонаи «Румигаз» – 873 ҳазор метри мукаабаро ташкил додаанд. Дар навбати худ, истеъмолгарон танҳо 73%-и маблағи истифодаи газро пардохт намудаанд.
Ба иттилои манбаъ, бо гази табиии ватанӣ аҳолӣ ва корхонҳои саноатии шаҳрҳои Кӯлобу Қӯрғонтеппа ва ҳамчунин қисман шаҳру навоҳии Душанбеву Румӣ, Сарбанд, Исфара ва Конибодом таъмин мегарданд.
Ёдрас мекунем, ки эҳтиёҷоти асосии ҷумҳурӣ ба гази табииро кишвари ҳамсояи Ӯзбекистон қонеъ мекунад. Мувофиқи қарордод, соли 2012 Тоҷикистон аз Ӯзбекистон бояд 145 млн. метри мукааб газ дастрас намояд, ки арзиши он 300 $ барои 1 ҳазор метри мукаабро ташкил медиҳад.
Истеъмолгарони асосии гази Ӯзбекистон дар ҷумҳурӣ Ширкати алюминии тоҷик (ТАЛКО) ва корхонаи «Тоҷиксемент» ва дар ҳаҷми начандон зиёд аҳолӣ мебошанд.
