Ташкилоти ҷамъиятии ҷавонони «Созандагони Ватан»-и Ҳизби халқии демократии Тоҷикистон ба роҳандозии як силсила иқдомоти таъмини ҷамъиятҳои варзишии шаҳру навоҳии ВМКБ бо таҷҳизоти варзишӣ шурӯъ кард.
Дар суҳбат бо хабарнигори ОИ «Азия-Плюс» раиси ташкилоти «Созандагони Ватан» Адҳам Мирсаидов дар ин робита изҳор кард, ки ин иқдомот ба муносибати таҷлили ҷашни 20-умин солгарди Иҷлосияи XVI-уми Шӯрои Олӣ ва ҷашни Рӯзи Парчами миллӣ (24-уми ноябр) сурат гирифта, чанде қабл чунин чорабинӣ дар ноҳияи Ванҷ доир гардид.
Ба қавли номбурда, рӯзи 22-юми ноябр дар шаҳри Хоруғ маросими тақдими таҷҳизоти варзишӣ ба ҷавонони Бадахшон ва конфронси вилоятии ҷавонон баргузор мешавад.
Ташкилоти ҷамъиятии ҷавонони «Созандагони Ватан»-и ҲХДТ моҳи апрели соли гузашта таъсис дода шуда, моҳи ноябр дар Вазорати адлия сабти ном шуд. Айни замон шумори аъзои ташкилот ҳудуди 12 ҳазор нафар ҷавононро ташкил медиҳад. Ғайр аз ин, ҳудуди 52 ҳазор нафар аъзои ҷавони ҲХДТ низ ба сафҳои ташкилоти «Созандагони Ватан» шомил шуданд.
Ҳизби халқии демократии Тоҷикистон соли 1994 таъсис ёфта, айни замон шумори аъзои он беш аз 175 ҳазор нафарро ташкил медиҳад. Раиси ҳизб президенти Тоҷикистон Эмомалӣ Раҳмон мебошад. Аксари аъзои ҳукумат, вакилони палатаи поёнии парлумон ва маҷлисҳои маҳаллии вакилони халқи вилоят ва шаҳру навоҳии ҷумҳурӣ аъзои ҲХДТ мебошанд.
